100 persoas desempregadas participarán no novo Programa Integrado de Emprego de Galicia de Fundación Laboral de la Construcción 2026-2027

A Consellería de Emprego, Comercio e Emigración vén de concederlle á Fundación Laboral de la Construcción a posta en marcha dun Programa Integrado de Emprego de Galicia, que conta co financiamento da Xunta de Galicia e do Servicio Público de Empleo Estatal (SEPE).

As actividades realizaranse nos Centros que a Fundación Laboral de la Construcción ten nos concellos de Arteixo, Narón, Lugo e Santiago de Compostela. 

Concretamente, búscase incorporar persoas desempregadas dos seguintes colectivos:

• Menores de 30 anos desempregados/as: 40 prazas.
• Perceptores/as de prestacións: 20 prazas.
• Migrantes: 40 prazas.

A formación a desenvolver durante o programa estará baseada no Catálogo de Especialidades Formativas do SEPE e terá relación co sector da construción, unha industria de gran expansión e con alta demanda de persoas traballadoras en Galicia e nas comarcas de Arteixo, Narón, Lugo e Santiago de Compostela.

Formación para o emprego

As persoas participantes poderán acceder a accións formativas orientadas á mellora da súa empregabilidade e adaptadas ás necesidades detectadas no mercado laboral e nas empresas colaboradoras.

• Accións formativas relacionadas coa construción sostible, a rehabilitación e a eficiencia enerxética dos edificios.
• Formación en prevención de riscos laborais asociada aos distintos oficios da construción e aos contidos esixidos pola normativa e polos convenios colectivos do sector.
• Formación en medios auxiliares empregados habitualmente nas obras de construción, incluíndo traballos en altura, montaxe de estadas, manexo de plataformas elevadoras móbiles de persoal (PEMP) e carretillas elevadoras.
• Outras accións formativas orientadas á adquisición, actualización e mellora das competencias profesionais demandadas polas empresas colaboradoras e adaptadas aos perfís das persoas participantes.

Bolsas e medidas de conciliación

Ademais cada participante terá á súa disposición un servizo de orientación laboral e realizaranse accións de prospección de emprego e intermediación con empresas.

Como apoio e favorecer a asistencia a accións, dispoñerase dunha bolsa de asistencia de 10€/día e medidas de conciliación:

• Flexibilidade horaria nas actuacións individuais.
• Adaptación das actuacións ás necesidades de conciliación das persoas participantes.
• Apoio á asistencia de persoas con menores ou dependentes ao seu cargo mediante servizos externos cando sexa necesario.
• Transporte colectivo para a asistencia ás accións do programa cando proceda.

Un 85% acadou os obxectivos de inserción na última edición

A finalidade deste tipo de programas é contribuír á dinamización do mercado laboral, implementando estratexias e accións conducentes a incrementar a empregabilidade e acadar a inserción laboral das persoas en busca activa de emprego. O obxectivo de inserción é do 45%.

Na última edición realizáronse máis de 712 horas de Formación do Catálogo de Especialidades do Servizo Público de Emprego Estatal non vinculada a certificados de profesionalidade e o 85% das persoas participantes acadaron os obxectivos de inserción laboral, segundo datos da entidade paritaria.

A presente convocatoria correspóndese coa Orde do 9 de xullo de 2026 pola que se establecen as bases reguladoras para a concesión de subvencións para a posta en práctica de programas integrados de emprego de Galicia e se convocan para o ano 2026 (código de procedemento TR332A). Consulta aquí a convocatoria.