O Centro de Información á Muller da Mancomunidade Santa Águeda forma a 21 mulleres no Centro de Ourense da Fundación Laboral
Este taller de bricolaxe para mulleres do rural forma parte do convenio de colaboración asinado entre a Fundación Laboral de la Construcción de Galicia e o CIM da Mancomunidade Santa Águeda para fomentar a igualdade.
A Fundación Laboral de la Construcción de Galicia acolleu no Centro de Formación de Ourense a celebración dun taller de bricolaxe, dirixido ás muller do rural e organizado polo Centro de Información á Muller (CIM) da Mancomunidade Santa Águeda.
Esta formación, impartida o 10 e o 11 de marzo no Centro de Formación de Ourense da Fundación Laboral, encádrase dentro das actividades realizadas polo CIM en sectores masculinizados para romper estereotipos e axudar ao empoderamento e crecemento profesional das mulleres do rural.
Dous días de formación teórica e práctica de bricolaxe básica
21 mulleres que viven nas zonas de Amoeiro, Coles, A Peroxa e Vilamarín participaron neste obradoiro con formación teórica e práctica de bricolaxe básica e pequenas reparacións no fogar.
Durante o primeiro día, as participantes tiveron unha clase teórica sobre trade impartido por Mary Rodríguez, xerente da ferraxería Americana xunto con J. Manuel Rego, dinamizador do CIM e Inma Freijeiro, directora do CIM.
María Nieto: "Animamos a todas a seguir formándose no sector da construcción"
A actividade rematou cunha clase práctica na que as participantes puideron familiarizarse co uso do trade. “Só dúas delas utilizaran o trade antes. O taller é unha boa forma de que perdan medo á hora de utilizar a ferramenta nas súas casas”, comenta María Nieto, responsable provincial do Centro de Formación de Ourense da Fundación Laboral de la Construcción de Galicia. “Animamos a todas a continuar formándose no sector da construcción e a súa resposta está sendo moi boa”, engade.
Esta actividade formativa forma parte do convenio de colaboración asinado entre a Fundación Laboral de la Construcción de Galicia e o Centro de Información á Muller da Mancomunidade Santa Águeda que ten por finalidade o asesoramento, intercambio de información e desenvolvemento de cursos dirixidos ao fomento da igualdade e a loita contra a violencia de xénero.