A compravenda de vivenda en Galicia cambia de tendencia: cae un 1,7% en xaneiro

A compravenda de vivenda en Galicia rexistrou un descenso do 1,7% no mes de xaneiro respecto ao mesmo mes de 2025, segundo acaba de publicar o Instituto Nacional de Estadística (INE). Con todo, as 2.263 operacións rexistradas a comezos do ano supoñen unha caída inferior á media española, cun recorte do 5%. 

Este cambio de tendencia na comunidade galega contrasta especialmente co incremento do 14,2% experimentado durante o ano pasado, cun total de 27.035 operacións. Delas, a maioría corresponden a vivendas libres (2.221) e só 42 sobre protexida. Segundo a súa antigüidade, 584 foron viviendas novas e 1.679, edificios usados.  

A nivel nacional, a compravenda de vivendas caeu en doce comunidades. Canarias (-21,94%), Madrid (-19,65%) e Asturias (-14,72%) lideran os descensos fronte a Navarra (+20,5%), A Rioxa (+11,8%) e País Vasco (+9,2%), que rexistraron importantes aumentos.  

As hipotecas rexistran o mellor xaneiro en 15 anos en Galicia

A firma de hipotecas sobre vivendas en Galicia foi de 1.574 en xaneiro de 2026, o maior rexistro obtido dende 2011 segundo os datos que fixo público o INE. Esta cifra supón un incremento do 16,1% na comunidade galega en comparación co mesmo mes de 2025, 10 puntos por enriba da media española, situada no 6,3%.

Trátase da quinta comunidade co maior aumento, por detrás de Estremadura (+28,80%), Navarra (+28,64%), Andalucía (+19,22%) e Asturias (16,2%).

Os préstamos para a constitución de hipotecas sobre vivendas aumentaron ata os 224,2 millóns de euros en Galicia no primeiro mes de 2026.