A Fundación Laboral de Galicia aborda posibles vías de colaboración no arraigo por formación con entidades sociais e Xunta
A entidade paritaria celebrou unha xornada de traballo con 35 representantes de 17 entidades, na que tamén participou a directora xeral de Formación e Cualificación para o Emprego da Xunta, Zeltia Lado Lago e na que se trataron as posibilidades de cooperación co fin de facilitar a inserción social e laboral de inmigrantes na industria da construción a través desta ferramenta
- A xornada reuniu a 35 representantes de 17 entidades sociais.
- Un momento da intervención de Fernando García Novo durante a presentación da xornada.
- Un momento da intervención de Zeltia Lado Lago durante a xornada.
- A xornada tivo lugar na sede en Santiago de Fundación Laboral de Galicia.
- Mesas de traballo celebradas durante a xornada.
Abordar posibles vías de colaboración na inserción laboral de inmigrantes na industria da construción a través do arraigo para a formación é o obxectivo da xornada de traballo celebrada hoxe pola Fundación Laboral de la Construcción de Galicia, na que participaron 35 representantes de 17 entidades do terceiro sector así como a directora xeral de Formación e Cualificación para o Emprego da Xunta, Zeltia Lado Lago.
As organizacións xunto coa entidade paritaria analizaron en distintas mesas de traballo os retos de levar á práctica o arraigo para formación, unha autorización que permite ás persoas estranxeiras obter un permiso de residencia legal en España a través dun compromiso de formación para a súa incorporación ao mercado laboral.
“A industria da construción é un bo destino para estes colectivos”
Á vista da necesidade de man de obra da industria da construción en Galicia -entre 1.400 e 1.700 persoas traballadoras novas cada ano-, o xerente do Consello Territorial de Galicia de Fundación Laboral de la Construcción, Fernando García Novo, expuxo ás entidades participantes que “a industria da construción é un moi bo destino para que estes colectivos desenvolvan a súa carreira profesional”.
Neste sentido, o arraigo para formación permítelles ás persoas inmigrantes acceder a unha formación cualificada, de maneira que “poden regularizar a súa situación e, á vez, entrar no mercado laboral”, destacou.
Segunda edición do programa de arraigo da Xunta
Pola súa parte, a directora xeral de Formación e Cualificación para o Emprego da Xunta, Zeltia Lado Lago, salientou os “resultados positivos” que obtivo o primeiro programa piloto de arraigo para a formación impulsado dende a Administración autonómica e do que xa está en marcha unha nova edición.
“É unha oferta flexible, moderna e aliada cos requirimentos do mercado laboral coa que contribuímos a facer un labor social e a fixar poboación no rural”, salientou a directora xeral que agradeceu o “compromiso e apoio da Fundación Laboral en mellorar a formación e o emprego”.
