A Fundación Laboral achega a máis de 5.000 alumnos/as de secundaria o programa ‘Ti elixes’ da Xunta contra os estereotipos en construción

A Fundación Laboral de la Construcción de Galicia achegou a máis de 5.000 alumnos/as de secundaria o programa ‘Que non te líen, ti elixes’ da Xunta dirixido a favorecer a orientación vocacional libre de estereotipos na elección de itinerarios formativos con menor presenza de mulleres.

A entidade paritaria rematou este mes de decembro a súa quinta colaboración coa campaña, financiada pola Consellería de Emprego, Comercio e Emigración, ofrecendo un total de 212 charlas a alumnado de 3º e 4º da Educación Secundaria Obrigatoria (ESO) en 65 centros educativos de Galicia para impulsar a presenza de mulleres en sectores masculinizados coma o da construción.

Existen traballos de homes ou de mulleres?

Durante os meses de novembro e decembro, persoal técnico da entidade paritaria de Galicia achegouse a 14 centros de educación secundaria de Galicia para impartir 33 charlas coas que se chegou a máis de 900 alumnos/as. 

As sesións da campaña foron impartidas por Lucía Espiño e Diego Vázquez, técnicos/as da entidade paritaria en Galicia e tres traballadoras do sector: Verónica Rivero, arquitecta técnica e xefa de obra; María Lorena Rubín, xefa de obra e Sehila Lozano, operaria de maquinaria pesada e docente da Fundación Laboral. 

Para impulsar a reflexión sobre os estereotipos e roles de xénero ligados ás profesións, plantexáronlles preguntas tales como "Existen traballos de homes ou de mulleres?" ou "Por que pensades que a porcentaxe de mulleres presentes no sector da construción é tan baixo en relación ao de homes?"

As sesións, cunha duración de 50 minutos, celebráronse en 14 centros educativos de Galicia: IES Manuel Murguía (Arteixo, A Coruña), IES de Oroso (Oroso, A Coruña), IES de Carral (Carral, A Coruña), IES Rego de Trabe (Culleredo, A Coruña), IES Plurilingüe Xosé Neira Vilas (Oleiros, A Coruña), IES Félix Muriel (Rianxo, A Coruña), IES de Monterroso (Monterroso, Lugo), IES Gregorio Fernández (Sarria, Lugo), IES Eduardo Blanco Amor (Ourense), CPI Plurilingüe Alfonso VII (Caldas de Reis, Pontevedra), IES de Sanxenxo (Sanxenxo, Pontevedra), IES da Illa de Arousa (Illa de Arousa, Pontevedra), IES Ricardo Mella (Vigo, Pontevedra) e IES Faro das Lúas (Vilanova de Arousa, Pontevedra).

As mulleres representan o 8,8% das persoas ocupadas do sector

Aínda que a presenza de mulleres nas obras de construción segue a ser moi inferior con respecto aos homes, hai que destacar que, nos últimos anos, se foi incrementando. De feito, hoxe en día, as mulleres representan o 8,8% das persoas ocupadas en construción en Galicia, un aumento do 15,7% respecto a 2023, con 771 traballadoras máis, segundo o informe de Mulleres no sector da construción 2024 elaborado polo Observatorio Industrial de la Construcción.